מגילת משפט המלך

כי תבוא אל הארץ אשר אנכי נותן לך וירשתה וישבת בה: ואמרת אשימה עלי מלך ככול הגוים אשר סביבותי: שום תשים עליך מלך‏ אשר‏ אבחר‏ בו‏ מקרב אחיך תשים עליך מלך: לא תתן עליך איש נוכרי אשר לא אחיך הוא: רק לא ירבה לו סוס ולא ישיב את העם מצרים למלחמה למען הרבות לו סוס וכסף וזהב: ואנכי אמרתי לך לא תוסיף לשוב בדרך הזאת עוד: ולא ירבה לו נשים ולא יסירו לבבו מאחרי וכסף וזהב לא ירבה לא מאד: ‏והיה בשבתו על כסא ממלכתו וכתבו לו את התורה הזאת על ספר מלפני הכוהנים: 

וזאת התורה‏ אשר יכתבו לו מלפני‏ הכוהנים:‏ ונשאו ביום אשר ימליכו אותו את ראש‏ בני ישראל מבן עשרים שנה ועד בן ששים שנה לדגליהם ופקדו בראשיהם שרי אלפים ושרי מאיות ושרי חמשים ושרי עשרות בכול עריהם: וברר לו מהמה אלף אלף מן המטה להיות עמו שנים עשר אלף איש מלחמה אשר לא יעוזבוהו לבדו ויתפש ביד הגוים: וכול הברורים אשר יבור יהיו אנשי אמת יראי אלוהים שונאי בצע וגבורי חיל למלחמה: והיו עמו תמיד יומם ולילה אשר יהיו שומרים אותו מכול דבר חטא ומן גוי נכר אשר לא יתפש בידם: 

ושנים עשר נשיאי עמו עמו ומן הכוהנים שנים עשר ומן הלוים שנים עשר אשר יהיו יושבים עמו יחד למשפט ולתורה ולא ירום לבבו מהמה ולא יעשה כול דבר לכל עצה חוץ מהמה:‏‏ 

ואשה לא ישא מכול בנות הגוים כי אם מבית אביהו יקח לו אשה ממשפחת אביהו: ולוא יקח עליה אשה אחרת כי היא לבדה תהיה עמו כול ימי חייה ואם מתה ונשא לו אחרת מבית אביהו ממשפחתו:

ולא יטה משפט ולא יקח שוחד להטות משפט צדק ולא יחמוד שדה וכרם וכל הון ובית וכל חמוד בישראל וגזל אנשיהם:‏ 

והיה כי ישמע‏ המלך‏ על כול גוי ועם‏ והוא‏ מבקש לגזול מכול אשר יש לישראל ושלח על שרי האלפים ועל שרי המאות הנתונים בערי ישראל ושלחו עמו מעשר העם‏ לצאת עמו למלחמה על אויביהם ויצאו עמו: ואם עם רב בא לארץ ישראל ושלחו עמו חמישית אנשי המלחמה ואם מלך ורכב וסוס ועם רב ושלחו עמו שלישית אנשי המלחמה: ושתי הידות יהיו שומרים את עריהם ואת גבולם אשר לוא יבוא גדוד אל תוך ארצם: וכי אם תחזק המלחמה עליו ושלחו לו מחצית העם את אנשי הצבא ומחצית העם לא יכרתו מעריהם‏: 

‏והיה אם נצחו את אויביהם ושברום והכום לפי‏ חרב ונשא את שללם ונתנו ממנו למלך מעשרו: ולכוהנים אחד מאלף וללויים אחד מן המאה מן הכול וחצו מחצית השאר בין תופשי המלחמה לאחיהם אשר הניחו בעריהם:‏

אם יצא למלחמה על אויביו ויצא עמו חמישית העם אנשי המלחמה כל גבורי החיל ונשמרו מכול דבר טמאה ומכול ערוות ומכול עוון ואשמה: 

ולוא יצא עד יבוא לפני הכוהן הגדול ושאל לו במשפט האורים והתומים על פיהו יצא ועל פיהו יבוא הוא וכל בני ישראל אשר אתו: לוא יצא מעצת לבו עד אשר ישאל במשפט האורים והתומים והצליח בכול דרכיו אשר יצא על פי המשפט אשר//

והמלך אשר זנה לבו ועינו ממצוותי לא ימצא לו איש יושב על כסא אבותיו כל הימים כי לעולם אכרית זרעו ממשול עוד על ישראל:

‏ואם בחוקותי ילך ואת מצוותי ישמור ויעש הישר והטוב לפני לא יכרת לו איש יושב מבניו על כסא מלכות ישראל לעולם: והיתי עמו והושעתיהו מיד שונאיו ומיד מבקשי נפשו לשאתה: ונתתי את כול אויביו לפניו ומשל בהמה כרצונו והמה לא ימשולו בו: ונתתיה למעלה ולוא למטה לראש ולא לזנב ויארך ימים רבים על מלכותו הוא ובניו אחריו:

-נוסח מהודר-