בַּיהוָה חָסִיתִי
אֵיךְ תֹּאמְרוּ לְנַפְשִׁי נודי הַרְכֶם צִפּוֹר׃ 
כִּי הִנֵּה הָרְשָׁעִים יִדְרְכוּן קָשֶׁת
כּוֹנְנוּ חִצָּם עַל יֶתֶר מיתר
לִירוֹת בְּמוֹ אֹפֶל לְיִשְׁרֵי לֵב׃
כִּי הַשָּׁתוֹת יֵהָרֵסוּן צַדִּיק מַה פָּעָל׃
יְהוָה בְּהֵיכַל קָדְשׁוֹ יְהוָה בַּשָּׁמַיִם כִּסְאוֹ
עֵינָיו יֶחֱזוּ עַפְעַפָּיו יִבְחֲנוּ בְּנֵי אָדָם׃
יְהוָה צַדִּיק יִבְחָן וְרָשָׁע וְאֹהֵב חָמָס שָׂנְאָה נַפְשׁוֹ׃
יַמְטֵר עַל רְשָׁעִים פַּחִים
אֵשׁ וְגָפְרִית וְרוּחַ זַלְעָפוֹת מְנָת כּוֹסָם׃
כִּי צַדִּיק יְהוָה צְדָקוֹת אָהֵב
יָשָׁר יֶחֱזוּ פָנֵימוֹ׃