אֵל אֱלֹהִים יְהוָה דִּבֶּר    
וַיִּקְרָא אָרֶץ מִמִּזְרַח שֶׁמֶשׁ עַד מְבֹאוֹ׃
מִצִּיּוֹן מִכְּלַל יֹפִי יְהוָה הוֹפִיעַ׃
יָבֹא אֱלֹהֵינוּ ואַל יֶחֱרַשׁ     
אֵשׁ לְפָנָיו תֹּאכֵל וּסְבִיבָיו נִשְׂעֲרָה מְאֹד׃
יִקְרָא אֶל הַשָּׁמַיִם מֵעָל וְאֶל הָאָרֶץ לָדִין עַמּוֹ׃
אִסְפוּ לִי חֲסִידָי כֹּרְתֵי בְרִיתִי עֲֿלֵי זָבַח׃
וַיַּגִּידוּ שָׁמַיִם צִדְקוֹ כִּי יְהוָה שֹׁפֵט הוּא סֶלָה׃
שִׁמְעָה עַמִּי וַאֲדַבֵּרָה יִשְׂרָאֵל וְאָעִידָה בָּךְ    
יְהוָה אֱלֹהֶיךָ אָנֹכִי׃
לֹא עַל זְבָחֶיךָ אוֹכִיחֶךָ וְעוֹלֹתֶיךָ לְנֶגְדִּי תָמִיד׃
לֹא אֶקַּח מִבֵּיתְךָ פָּר מִמִּכְלְאֹתֶיךָ עַתּוּדִים׃
כִּי לִי כָל חַיְתוֹ יָעַר בְּהֵמוֹת בְּהַרְרֵי אָלֶף׃
יָדַעְתִּי כָּל עוֹף הָרִים וְזִיז שָׂדַי עִמָּדִי׃
אִם אֶרְעַב לֹא אֹמַר לָךְ כִּי לִי תֵבֵל וּמְלֹאָהּ׃
הַאוֹכַל בְּשַׂר אַבִּירִים וְדַם עַתּוּדִים אֶשְׁתֶּה׃
זְבַח לְאֱלֹהִ֗ים תּוֹדָה וְשַׁלֵּם לְעֶלְיוֹן נְדָרֶיךָ׃
וּקְרָאֵנִי בּיוֹם צָרָה אֲחַלֶּצְךָ וּתְכַבְּדֵנִי׃
וְלָרָשָׁע אָמַר אֱלֹהִים 
מַה לְּךָ לְסַפֵּר חֻקָּי וַתִּשָּׂא בְרִיתִי עֲלֵי פִיךָ׃
וְאַתָּה שָׂנֵאתָ מוּסָר וַתַּשְׁלֵךְ דְּבָרַי אַחֲרֶיךָ׃
אִם רָאִיתָ גַנָּב וַתַּרֹץ עִמּוֹ     
וְעִם מְנָאֲפִים חֶלְקֶךָ׃
פִּיךָ שָׁלַחְתָּ בְרָעָה וּלְשׁוֹנְךָ תַּצְמִיד מִרְמָה׃
תֵּשֵׁב בְּאָחִיךָ תְדַבֵּר בְּבֶן אִמְּךָ תִּתֶּן דֹּפִי׃    
אֵלֶּה עָשִׂיתָ וְהֶחֱרַשְׁתִּי 
דִּמִּיתָ הֱיוֹת אֶהְיֶה כָמוֹךָ   
אוֹכִיחֲךָ וְאֶעֶרְכָה לְעֵינֶיךָ׃
בִּינוּ נָא זֹאת שֹׁכְחֵי אֱלוֹהַּ פֶּן אֶטְרֹף וְאֵין מַצִּיל׃
זֹבֵחַ תּוֹדָה יְכַבְּדָנְנִי    
וְשָׂם דֶּרֶךְ אֱרְאֶנּוּ בְּיֵשַׁע יְהוָה׃